姚：先生
周：喊我猩猩
姚：勿是猩猩，是先生
姚：侬四楼刚来
周：我死勒刚来
姚：勿是死勒刚来，是四楼刚来
周：看看里向个
姚：侬要买皮箱，阿拉侪是真皮皮箱
周：里向个各种袜子
姚：侬要买钢宗镬子
周：脚浪着个袜子
姚：侬脚浪着镬子
周：脚浪着镬子，头浪要顶洋风炉
姚：侬要买头号个洋风炉
周：要下头个
姚：要火腿，还是要脚爪
周：脚浪向外头一层个
姚：咸肉皮，咸肉皮阿拉勿卖个
周：谢谢侬勿要七搞八搞
姚：侬要买七块肥皂，有个，七块肥皂，阿拉侪是檀香肥皂
周：个能要吃饱仔人参跟侬讲
姚：侬要买七磅人参，侬为啥要买介许多人参
周：问侬味之素有伐
姚：女厕所有个
周：要小瓶个
姚：侬男人介小便上女厕所，侬滑头码子
周：个能下去要死人了
姚：侬要买药水瓶
周：热水瓶，一家门要吃热水的热水瓶
姚：晓得来，倷一家门要吃药水个药水瓶
周：侬投五投六忙煞哉
姚：侬要买大红大绿个洋毛衫，有个，外加侪是全羊毛个
周：侬勿要勿识相
姚：侬要拍照相，拍照相三楼
周：我勒触侬霉头
姚：侬要买只馒头
周：侬样样侪勿懂，侬只洋盘
姚：娘舅，啥人是侬娘舅，阿拉勿是娘舅
周：真真碰着七十二只大头鬼
姚：侬要买七十二斤大头菜
周：噢哟
姚：侬要淴浴
周：噢哟，姆妈
姚：侬要淴浴个拖鞋
周：我勒骂侬
姚：侬要买只马桶
（完）